EN RU AB

АЖӘАБЖЬҚӘА

Асахьаҭыхҩы Мариа Ҧлиаҧҳа ҳазҭагылоу аамҭазтәи лҟазара   ацәыргақәҵа «OneWay» аатуеит Москва ақалақь аҟны

05.08.2015

Асахьаҭыхҩы Мариа Ҧлиаҧҳа ҳазҭагылоу аамҭазтәи лҟазара ацәыргақәҵа «OneWay» аатуеит Москва ақалақь аҟны

Нанҳәамза 18 инаркны 30-нӡа Москва ақалақь аҟны москватәи аҧсуа диаспора иҟанаҵо адгылара иабзоураны иаатуеит асахьаҭыхҩы Мариа Ҧлиаҧҳа ҳазҭагылоу аамҭазтәи лҟазара ацәыргақәҵа «OneWay». Мариа Ҧлиаҧҳа хаҭалатәи лцәыргақәҵаҟны ицәыргахоит асахьаҭыхҩы contemporary art («иактуалтәу аҟазара») астиль ала иҩу лусумҭа ҿыцқәа. Аекспозициа мҩаҧысуеит иахьатәи аамҭазтәи ацәыргақәҵатә зал «Твинхолл» аҟны Москва агәҭаны.

Мариа Давид-иҧҳа Ҧлиаҧҳа диит 1982 шықәсазы Аҟәа ақалақь аҟны. 10 шықәса анылхыҵ инаркны дынхон, аҵара лҵон Москва. Мариа далгеит В.И. Суриков ихьӡ зху Москватәи Аҳәынҭқарратә академиатә сахьаҭыхратә институт асахьаҭыхҩы-аҿыханҵаҩы изанааҭ ала, иара убас Жәларбжьаратәи адизаин ашкол аинтериер адизаинаҧҵаҩы изанааҭ ала. Аҟәа ақалақь аҟны иаҧылҵеит асахьаҭыхратә студиа. Уи Москватәи Асахьаҭыхҩцәа реидгыла далахәуп, далахәуп иара убас Аҧсны Асахьаҭыхҩцәа реидгыла. Ахәыҷқәеи адуқәеи рзы иаҧылҵеит аҿыханҵа астудиа. Иеиҿылкаауеит агәыҳалалратә цәыргақәҵақәа. М. Ҧлиаҧҳа раҧхьатәи лцәыргақәҵа мҩаҧысит 2008 шықәсазы. Ари аамҭа иалагӡаны асахьаҭыхҩы лколлекциаҟны ицәырҵит иеиуеиҧшым астильқәеи ажанрқәеи рыла иаҧҵоу асахьаҭыхымҭақәа маҷымкәа. «Ҳәарада, дарбансахьаҭыхыҩзаалак иеиҧш, саргьы, сазхаҵара аныҟало ҳәа сыҧшуп. Уи сыҧсы ҭанаҵы иҟалап ҳәа сгәыҕуеит»,- лгәы иҭаз аартны илҳәеит Мариа Ҧлиаҧҳа.

Шьаҿа-шьаҿала иааиуеит Мариа лазхаҵарагьы. 33 шықәса зхыҵуа Мариа Москвеи Аҧсни иҟоу апрофессионалтә сахьаҭыхҩцәа реидгылақәа ҩба дрылахәуп. Аҧсуа ҿыханҵаҩ қәыҧш лыхьӡ асахьаҭыхҩцәа ҟазацәа рыҩныҵҟа есааира иеицырдыруа иалагеит. Уи дырдыруеит, лыӡбахә рҳәоит. Ари зхатә хаҿра змоу арҿиара зырҵабыргуа акы акәны иҟоуп.
« Иҟоуп музыкантцәақәак знык-ҩынтә ишыхәмарызгьы, иаранак зыстиль ахы цәырнаго. Иҿоу асахьаҭыхҩы дыҧшаалароуп акыраамҭа. Мариа – иҧшаауа сахьаҭыхҩуп. Ҩажәа инацны ақәра змоу макьана дқәыҧшуп», - ҳәа иҧхьаӡоит Аҧсны Асахьаҭыхҩцәа реидгыла ахантәаҩы Адгәыр Ӡиӡариа.

Нанҳәамза 30 асааҭ 15:00 рзы – ацәыргақәҵа официалла аркра, акалкалкра (фуршет) мҩаҧгахоит.

Ацәыргақәҵа арыцхә – нанҳәамза 18-30

Аҩналара хәыда-ҧсадоуп

Аҭыӡҭыҧ - 1-тәи Шьипковтәи абжьаларҭа, 4

Ацәыргақәҵатә зал «Twinhall»

468


АХЬӠЫНҴА АЗЫХЫНҲӘРА