EN RU AB

АЖӘАБЖЬҚӘА


27.03.2015

МОСКВА ИМҨАҦЫСИТ МОСКВАТӘИ АҦСУА ДИАСПОРА ЕСЫШЫҚӘСАТӘИ 57-ТӘИ АИҦЫЛАРА

Москва имҩаҧысит Москватәи Аҧсуа диаспора есышықәсатәи 57-тәи аиҧылара.

Сынтәатәи 57-тәи Есышықәсатәи Москватәи Аҧсуа диаспора аиҧылара иеизнагеит Москва инхо 450 – ҩык аҧсуаа, иагьымҩаҧысит аҧсуа еишәачараҟны асасдкылара иаҵоу аҧхарреи агәыбылреи ацны. Аиҧылараҟны сасдахьдақәаны иҟан Шьамтәылатәи Арабтә Республика, Ареспублика Џибути, Ареспублика Бенина ацҳаражәҳәаҩцәа, Урыстәыла ААРи Палестинеи рхаҭарнакцәа, Урыстәыла иҟоу Азинмчызмоу Аҧсны Ацҳаражәҳәаҩ И. М. Ахба, аҧсуа-ашәуа (абаза) жәлар Адунеизегьтәи рконгресс апрезидент Т. М. Шамба, москватәи ауаажәларра рхаҭарнакцәа.

57-тәи Есышықәсатәи Москватәи Аҧсуа диаспора аиҧылара апрограмма акыр ибеиан, уагәыланахалон. Амҩаҧгаҩцәа - КВН «Аҧснытәи Нарҭаа» акомандаҟнытә Дамеи Чанбеи ашәаҳәаҩ Рамина Задеии раҧхьаӡакәны москватәи адиаспора иддырдырит амузыкатә проектқәа «Apsny Star», «Голос.Дети» алауреатцәа ҿарацәа.
Асасцәа рҿаҧхьа иқәгылеит аишьцәа Ҭемыри Дениси Ҳагаа иеицырдыруа рџьаз-гәыҧ «TIM Band» адунеитә хитқәа рыҟнытә аџьазтә композициақәеи аҧсуа шәақәеи нагӡо.
Лаша Марыхәба иаҧиҵаз аҧсуа кәашаратә коллектив «Амцамбзи» адыга ансамбль «Черкессиеи» инарыгӡеит амца иаҩызаз узырцыхцыхуаз аҧсуа-адыга кәашарақәа.
Асасцәа рзы иара убас имҩаҧган ирлахҿыхгаз алотереиа хәмарра, аҧхьахәқәа зцыз. Ҳамҭак иаҩызаз аҧхьахәқәа рыдыргалеит абаҩхатәра злоу ҳџьынџьуаа: аоператә шәаҳәаҩцәа Хьыбла Гьерзмава, Алиса Гыцҧҳа, ашәҵатәы адизаинерцәа Расида Лакоба («Rasario»), апроект «Colors of Nation» аҧҵаҩцәа, асахьаҭыхҩы Нино Ӡаҧшь-иҧа, адизанер Аида Гыцҧҳа, адизаинер – афлорист Жанна Ҧлиаҧҳа, имиџ-консультант Асҭанда Чегиаҧҳа. Асасцәа рзы аҧхьахәқәа аздырхиеит иара убас иеицырдыруа аресторанқәа «Черноморская Ривьера», «Сам пришел». Адиаспора ахаҭарнакцәа ҿарацәа рзы адискотека мҩаҧигеит Еснаҭ Кобахиа, DJ Finn Tarro - сноуборд афестивальқәа ррезидент AvoSnowFest и Snowpasta.
«Ас еиҧш иҟоу аиҧыларақәа Москва иҟоу аҧсуа диаспоразы даара иаҭахуп аҧсуа жәлари, аҧсуа милаҭ ркультура беиеи ҳахәҭакны ҳшыҟоу ҳдыруазарц, ҳаимадара арҕәҕәаразы, - иҳәеит Беслан Агрба, Москватәи аҧсуа диаспора ахада».

МАД Апресс-маҵзура

389


АХЬӠЫНҴА АЗЫХЫНҲӘРА